紋繍係我工作的一部分,一個專業嘅紋繍師,除咗年資、經驗,平時練習都重要。好多人以為做紋繍師好搵錢,同客做一條眉最少都收2千幾3千,所以個個都紛紛走去學;當學嘅時候發現原來唔係自己所想嘅咁容易,最終放棄。亦有啲人學完因為唔夠客底,所以攞唔到經驗,顧客冇乜信心,最終搵唔到客要放棄。
其實做一個紋繍師真係唔容易!想做一條靚嘅眉毛,唔係就咁用把尺量度完,之後跟住畫就可以繍到出嚟!有冇諗過用把尺 “直筆甩” 求其對稱左條眉客人就會鍾意?韓式一字眉形係咪真係可以迎合所有人?
其實客人係有要求嘅,係我過百個客人當中,佢哋都有自己鍾意的眉形;有啲都會比張明星相或者眉形相你睇做要求! 咁點樣先至迎合到客人嘅要求?係咪客人想點做就一定可以做得到?
首先每個人嘅面形同埋輪廓都唔一樣,仲有眉骨同埋眼形都需要注意,甚至乎樣貌都要睇吓同條眉夾唔夾,所以整一條眉毛都好有學問。